मित्रांनो महाराष्ट्रातील क्रीडा शिक्षकांसाठी अत्यंत आनंदाची बातमी समोर आली आहे. राज्याचे क्रीडामंत्री माणिकराव कोकाटे यांनी स्पष्ट केले आहे की, लवकरच क्रीडा शिक्षकांच्या रिक्त जागा भरल्या जाणार आहेत. त्यांनी सांगितले की, २५१ विद्यार्थ्यांमागे एक क्रीडा शिक्षक नियुक्त केला जाईल. अनेक वर्षांपासून या भरतीची वाट पाहणाऱ्या पात्र शिक्षकांसाठी ही आशेची किरण ठरली आहे.
गेल्या १० ते १२ वर्षांपासून शासनाने अनुदानित शाळांमध्ये क्रीडा शिक्षकांची कोणतीही भरती केलेली नाही. परिणामी अनेक प्रशिक्षित बीपीएड आणि एमपीएड धारक उमेदवार बेरोजगार आहेत. अनेकजण खासगी शाळांमध्ये कमी मानधनावर काम करून उपजीविका चालवतात. काही शिक्षकांनी तर NET, SET आणि Ph.D. सारख्या पात्रता परीक्षा उत्तीर्ण केल्या असूनही त्यांना शासन नोकरी मिळालेली नाही.
क्रीडा शिक्षकांनी शासनाकडे अनेकदा निवेदन दिले असून त्यांनी २०१३ पासून भरती न झाल्याबद्दल नाराजी व्यक्त केली आहे. काही शिक्षकांनी सांगितले की, “आमचे वय आता वाढत आहे आणि संधी संपत चालल्या आहेत.” या शिक्षकांची ही वेदना केवळ त्यांचीच नाही, तर राज्यातील क्रीडा संस्कृतीसाठीही मोठं नुकसान आहे.
क्रीडामंत्री माणिकराव कोकाटे यांनी दिलेल्या वक्तव्यात त्यांनी स्पष्ट केले की, “क्रीडा शिक्षकांच्या जागा भरल्या जाणार आहेत. वित्त विभागाशी चर्चा सुरू असून निर्णय लवकरच घेण्यात येईल.” त्यांच्या या वक्तव्याने हजारो पात्र शिक्षकांमध्ये नव्या आशा निर्माण झाल्या आहेत.
आज महाराष्ट्राने खेलो इंडिया सारख्या राष्ट्रीय स्पर्धांमध्ये दुसरे स्थान पटकावले आहे, पण यामागे काम करणारे क्रीडा शिक्षक मात्र रोजंदारीवर काम करत आहेत. राज्यात आजही असे अनेक शिक्षक आहेत जे खेळाडू घडवण्यासाठी आपले जीवन वाहून घेत आहेत, पण स्थैर्य नसल्याने त्यांना मानसिक आणि आर्थिक त्रास सहन करावा लागतो.
अनेक शिक्षकांनी सांगितले की, “कोरोना काळात शाळांनी आम्हाला कामावरून कमी केले. काहींना खासगी कंपन्यांमध्ये काम करावं लागलं.” ही स्थिती बदलण्यासाठी सरकारने ठोस पावलं उचलण्याची गरज आहे.
क्रीडा शिक्षकांची भरती झाल्यास फक्त शिक्षकांना रोजगार मिळणार नाही, तर राज्यातील विद्यार्थ्यांना शारीरिक शिक्षण आणि खेळांबद्दल योग्य मार्गदर्शन मिळेल. २०२५ च्या सुरुवातीला अधिसूचना जाहीर होण्याची शक्यता असून पात्र उमेदवारांनी आपली कागदपत्रे तयार ठेवावीत. ही भरती फक्त रोजगाराची संधी नसून, महाराष्ट्राच्या क्रीडा संस्कृतीला नवसंजीवनी देणारी पाऊलवाट ठरणार आहे.
